الدبلة

وجّهـت سجّادتـي والوجـه للقِبلـه.........ودعيت له فـي غيابـه قـرّة أعيانـي

الغالـي اللـي فـلا بعـده ولا قَبلـه.............الأوّلي .. ما يخاشـره الغـلا ثانـي

شهرين أرتّب كلامي له وأرتّـب لـه.......أحلى القصايد عسى ترضيـه قيفانـي

حـرٍ ملكنـي بطيبـة قلبـه ونبـلـه................جيته فقيـرة حنـان وبالهـوى جانـي

يومي غرقت بهمومي مدّ لـي حبلـه............بكـف الشهامـه ولا مَـرّ وتعدّانـي

مدري متى يرتوي الخفّاق مـن وبلـه........وتزهر ورود المحبّه وسـط شريانـي

عيني عماها السهـر والكبـد مندبلـه........وقلبي تملّل واقول :إصبر على شانـي

ليلى ، بُثينـه ، وحـب الثالثـه عبلـه..................يهـون عنـد الغـرام اللـي تولاّنـي

كل ما عرض في خيالي طيفه أنشب له.........في كم سؤالٍ سبب ضيقي وحرمانـي

كان (الدراسـه) توافيـقٍ تقـرّب لـه.....................الله يسـدّد خُطـاه بـكـل ميـدانـي

وكانه لقـا مـن يحـط بكفّهـا دبلـه...................جِعل السعاده نصيبه .. يـوم خلاّنـي